Фондација Претприемачки сервис за млади (ПСМ) во соработка со Swedish Trade Council го најавуваат „Mobile AppCamp“, тридневен настан каде учесници од Македонија и Европа преку тимска работа и под интензивно менторство од домашни и странски експерти ќе развиваат комерцијални мобилни апликации со потенцијал за пенетрација на глобалниот пазар. Целта на проектот е развивање и зајакнување на економско - технолошките врски помеѓу Македонија и високо развиените Европски земји во областа на мобилните апликации и бизниси.

Проектот има директен придонес во:

• Процесот на забрзување на иновациите во доменот на мобилната технологија,
• Обезбедување на можности за забрзан раст на бизнисите поврзани со мобилните апликации,
• Надминување на бариерите за постигнување мултинационални и мултикултурни партнерства,
• Формирање мрежа од интернационални ментори, експерти и менаџери за развој на апликации за обезбедување континуирана поддршка за понатамошен развој на креираните бизниси, и
• Забрзување на интеграцијата на Македонија кон развиените земји во областа на информатичкото општество и синхронизација со глобалните трендови во мобилните технологии. 

Структурата на тридневниот камп е составена од два дела:

• Програма за развој на капацитетите на претприемачите учесници кои ќе развиваат мобилни апликации, во која ќе бидат опфатени клучни теми за постигнување успех, како комерцијализација на иновации и подготвување за обезбедување инвестиции. Целта на програмата е развивање на посебни претприемачки вештини за дефинирање на компоненти кои ќе ја трансформираат мобилната апликација во старт-ап бизнис со потенцијал за глобален раст и развој. 
• Развој на мобилни апликации со стратегија за нивна пенетрација на глобалниот пазар каде најдобрите мобилни апликации ќе бидат наградени со цел постигнување понатамошно усовршување. Панел од домашни и странски говорници (релевантни експерти, бизнис претставници, претприемачи) и ментори ќе работат интензивно со учесниците со цел дефинирање успешен модел на таканаречен „мобилен бизнис“.